တၢင်းၵိၼ်ၵေႃႈဢမ်ႇဢိုပ်း၊ တူဝ်ၶိင်းၵေႃႈႁၢင်ႊလီ၊ ပၢႆးယူႇလီၵေႃႈၶႅမ်ႉ တွၼ်ႈ(2)

ပေႃးႁၼ်တၢင်းၵိၼ် ဢၼ်မီးၽၢင်ႁၢင်ႊ လႅပ်ႈလီၵိၼ် လႅပ်ႈမီးၼမ်ႉဝၢၼ်ၶိုၵ်ႉတွၼ်းၸိုင် ၽႂ်ႁၼ်ၵေႃႈ ၼမ်ႉလၢႆးပုၼ်း ၶႂ်ႈၵိၼ်မႃးၵမ်းလဵဝ်ယဝ်ႉ။ ၵူၺ်းပေႃးၵိၼ်ၵႂႃႇသမ်ႉၵူဝ်ပီး၊ ၵူဝ်ၶႆမၼ်းၼႂ်းတူဝ်ၶိင်းၽိူမ်ႉ၊ ၵူဝ်တုမ်ႉတိူဝ်ႉပၢႆးယူႇလီ ၸဵမ်ၸိူဝ်းၼႆႉသေ ၽၢႆႇ႞တၢင်း႞ၵေႃႈ ယွၼ်ႉဢမ်ႇႁူႉ လွၵ်းလၢႆးၵိၼ် လႄႈ ပိုၼ်ႉႁူႉ ႁူဝ်ယွႆႈလွင်ႈတၢင်းၵိၼ်ၸိူဝ်းၼၼ်ႉသေ ဢွၼ်ၵၼ် ဝႄႈတၢင်းၵိၼ်ယႅမ်ႉ ၶၢမ်ႇဢိုပ်းတၢင်းၵိၼ် ဢၼ်ၸဝ်ႈၵဝ်ႇၶႂ်ႈၵိၼ်ၼၼ်ႉမႃးယူႇယဝ်ႉ။

ၼင်ႇႁိုဝ် တူဝ်ၶိင်းၵေႃႈ တေႁၢင်ႊလီ ၶိုၵ်ႉၶႅမ်ႉမိူၼ်ၼင်ႇၵၢင်ၸႂ်ၸဝ်ႈၵဝ်ႇၶႂ်ႈပဵၼ်ၼၼ်ႉသေ တၢင်းၵိၼ်ၵေႃႈဢမ်ႇဢိုပ်း တေဢမ်ႇလႆႈၼူမ်ဢဝ်ဢၢႆမၼ်းလၢႆလၢႆၵွႆးလႄႈ ယွၼ်ႉတၢင်းၵိၼ်သေ ၼင်ႇႁိုဝ် တေဢမ်ႇတုမ်ႉတိူဝ်ႉပၢႆးယူႇလီၸဝ်ႈၵဝ်ႇၼၼ်ႉ ထုၵ်ႇလီႁဵတ်းၸိူင်ႉႁိုဝ်ၼႆ လဵပ်ႈႁဵၼ်း လူဢၢၼ်ႇတူၺ်း ၶေႃႈမုၼ်းႁူဝ်ယွႆႈမၼ်း ၽၢႆႇတႂ်ႈၼႆႉတေလႆႈႁူႉယူႇ။

👉👉👉👉လဵၼ်ႈဢဵၼ်ႁႅင်း ႁဵတ်းၽိုၵ်းသၼ်းပၼ် ပိူဝ်ႈတႃႇၵၢမ်ႈၼိူဝ်ႉၵႅၼ်ႇၶႅင် လႄႈ လူတ်းယွမ်းၶႆမၼ်း

ပိူဝ်ႈတႃႇ ၼမ်ႉၼၵ်းတူဝ်ၶိင်း​ တေယွမ်းသေ မီးတူဝ်ၶိင်း ၵၢမ်ႈၼိူဝ်ႉ ၵႅၼ်ႇၶႅင်လီၼၼ်ႉ ဢွၼ်တၢင်းသုတ်း တေလႆႈဝႄႈ တၢင်းၵိၼ်ယႅမ်ႉ ဢၼ်ပႃးၶႆမၼ်းၼၼ်ႉယဝ်ႉ။ ၵိၼ်သင်ၵေႃႈယဝ်ႉ တေဢမ်ႇလႆႈၵိၼ်ဢိမ်ႇတိူၵ်ႈတႅၵ်ႉ။ ပေႃးတွင်ႉမႆႈၼမ်ႉၵေႃႈ ၵိၼ်ၼမ်ႉၵွႆးလႄႈ။ ဢမ်ႇထုၵ်ႇလီၵိၼ် ၼမ်ႉၸဵမ်း၊ ၼမ်ႉဝၢၼ်၊ ပီႇယႃႇ၊ လဝ်ႈ ၸဵမ်ၸိူဝ်းၼႆႉ။ လဝ်ႈ လႄႈ ပီႇယႃႇၼႆႉ ႁဵတ်းႁႂ်ႈ ၶိူင်ႈၼႂ်းတူဝ်ၶိင်း ဢမ်ႇသႅၼ်ႈသႂ်လႄႈ ပေႃးၵိၼ် လဝ်ႈ၊ ပီႇယႃႇဝႆႉၸိုင် ထုၵ်ႇလီၵိၼ်ၼမ်ႉပၼ်ၼမ်ၼမ်ၸွမ်း။ လဝ်ႈ လႄႈ ပီႇယႃႇၼႆႉ ၸၢင်ႊႁဵတ်းႁႂ်ႈ ၵူဝ်ႇလတ်သထေႃးဢၼ်ဢမ်ႇသႅၼ်ႈသႂ် ၼႂ်းတူဝ်ၶိင်းႁဝ်း ၼမ်တိူဝ်းမႃးသေ ၸၢင်ႊပီးလူၼ်ႉ ပီးလိူဝ် ၼႆယဝ်ႉ။

ပေႃးၼၼ်ၸိုင် ၼိုင်ႈဝၼ်းလႂ် ထုၵ်ႇလီႁဵတ်းၽိုၵ်းသၼ်း လဵၼ်ႈဢဵၼ်ႁႅင်းပၼ် တူဝ်ၶိင်း မွၵ်ႈ ၼိုင်ႈၸူဝ်ႈမူင်း မိူၼ်ၼင်ႇ ပႆတၢင်း (ႁႂ်ႈမိူၼ်ၼင်ႇ လႅၼ်ႈယွႆႈ)၊ ပၼ်ႇလူတ်ႉထိပ်ႇ၊ ဝၢႆႈၼမ်ႉ (လုၺ်းၼမ်ႉ) ၸဵမ်ၸိူဝ်းၼႆႉ။ ပေႃးၼၼ်ၸင်ႇ တၢင်းၵိၼ်ယႅမ်ႉ ဢၼ်ၵိၼ်ယူႇၵူႊဝၼ်းၼၼ်ႉ တေဢမ်ႇယဵၼ်းပဵၼ် ၶႆမၼ်းၸပ်းဝႆႉၼႂ်းတူဝ်ၶိင်း​သေ တေယဵၼ်းပဵၼ်ႁိူဝ်ဢွၵ်ႇၵႂႃႇသဵင်ႈမူတ်းၼၼ်ႉယဝ်ႉ။

👉👉👉တေလႆႈထိင်းတၢင်းၵိၼ်ယႅမ်ႉ ႁိုင်ၵႃႊႁိုဝ်

ၼင်ႇႁိုဝ် တူဝ်ၶိင်းတေႁၢင်ႈလီၼၼ်ႉ တေလႆႈဢူတ်းယိူၼ်ႉတၢင်းၵိၼ်ယႅမ်ႉသေ ၵုမ်းထိင်းၽၢင်ႁၢင်ႊၵႂႃႇႁိုင်ၵႃႊႁိုဝ် ဢၼ်ဝႃႈၼၼ်ႉတႄႉ ပေႃးၸဝ်ႈၵဝ်ႇ ၶႂ်ႈႁၢင်ႊလီထိုင် ဢႃႇယု 50 ပီႊ 60 ပီႊၵေႃႈ တေလႆႈၵုမ်းထိင်း လိူၵ်ႈၵိၼ်တၢင်းၵိၼ်ယႅမ်ႉၵႂႃႇ တေႃႇထိုင်ၶၢဝ်းၼၼ်ႉယဝ်ႉ။ သင်ၵုမ်းထိင်း တၢင်းၵိၼ်ယႅမ်ႉၵႂႃႇၸွမ်းၵူႊဝၼ်းၸိုင် ႁိုင်ႁိုင်မႃးၵေႃႈ တၢင်းယၢမ်ႈဢၼ်ၶႂ်ႈၵိၼ်ၼၼ်ႉ တေယွမ်းလူင်းၵႂႃႇ။ တူဝ်ယၢင်ႇ- ၶဝ်ႈၶမ်ႈၼႆႉ မၵ်းမၼ်ႈဝႆႉဝႃႈ တေဢမ်ႇၵိၼ်ႁႂ်ႈလိူဝ်တႃႇ 12 ၸေႃႉ။ တေၵိၼ်ၽၵ်းၶဵဝ်သႃႈၼမ်ၼမ်သေ ၵိၼ်ၼမ်ႉၽၵ်း ႁႂ်ႈဢိမ်ႇတွင်ႉ။ ယဝ်ႉၵေႃႈ တေလႆႈဝႄႈတၢင်းယၢမ်ႈဢၼ်မေႃ ၵိၼ်ယဝ်ႉ ၼွၼ်းၵမ်းလဵဝ်ၼၼ်ႉ ၼႆယဝ်ႉ။

👍👍👍တေႁဵတ်းႁိုဝ် ၵုမ်းထိင်း ၵၢၼ်ၵိၼ်ယႅမ်ႉ

မိူဝ်ႈထိင်းၵၢၼ်ၵိၼ်ယႅမ်ႉၼၼ်ႉ တေလႆႈၽိူမ်ႉပၼ် ထၢတ်ႈဢႃႇႁႃႇရတူဝ်ၶိင်း ႁႂ်ႈတဵမ်ထူၼ်ႈၼႆ ဢမ်ႇထုၵ်ႇလီလိုမ်း။ တၢင်းၵိၼ်ဢၼ်ၸဝ်ႈၵဝ်ႇၵိၼ်ၼၼ်ႉ တေလႆႈပဵၼ်တၢင်းၵိၼ် ဢၼ်ပၼ်ၽွၼ်းလီ လႄႈ မီးထၢတ်ႈဢႃႇႁႃႇရ ပိူဝ်ႈတႃႇတူဝ်ၶိင်း။ ၶဝ်ႈၼႂ်၊ ၶဝ်ႈဝၼ်းၼႆႉ လမ်ႇလွင်ႈတႃႇတူဝ်ၶိင်း တေႉတေႉလႄႈ ထုၵ်ႇလီ ၵိၼ်ပၼ်တဵမ်ထူၼ်ႈ။ ပေႃးပဵၼ်လႆႈ ႁုင်မိုဝ်ႉၵိၼ်ႁင်းၵွႆးၼၼ်ႉ လီတီႈသုတ်းယဝ်ႉ။ တၢင်းၵိၼ်ဢၼ်ပိူၼ်ႈၶၢႆၼၼ်ႉ ဝၢၼ်တၢၼ်ႇႁိုဝ်ၵေႃႈယဝ်ႉ ယွၼ်ႉပိူၼ်ႈၸႂ်ႉဝႆႉ ၼမ်ႉမၼ်း၊ ၽွင်ဝၢၼ်၊ ၽွင်ၼိူဝ်ႉၵႆႇ ၸိူဝ်းၼႆႉၼမ်ၼႃႇလႄႈ ၸၢင်ႊႁဵတ်းႁႂ်ႈ ၸပ်းတၢင်းပဵၼ်လိူတ်ႈသုင်၊ ႁူဝ်ၸႂ်ၵပ်ႉၸိူဝ်းၼႆႉၵွၼ်ႇ။

လွင်ႈၵုမ်းထိင်း ၵၢၼ်ၵိၼ်ယႅမ်ႉၼႆႉ ဢမ်ႇၸႂ်ႈဝႃႈ ႁဵတ်းၸွမ်းၵႂႃႇ ၶၢဝ်းပွတ်းသေ တေထိုင်တီႈ။ ပေႃးႁဵတ်းၸွမ်းၵႂႃႇၶၢဝ်းႁိုင် ဢၢၼ်ႇလိူၼ်၊ ပီႊမၼ်းၵွၼ်ႇ ၸင်ႇတေထိင်းၼမ်ႉၼၵ်း တူဝ်ၵဝ်ႇလႆႈ လႄႈ ႁေႉၵင်ႈလႆႈ လွင်ႈပီးလူၼ်ႉပီးလိူဝ်ၼၼ်ႉယဝ်ႉ။ ၵူၼ်းၼိုင်ႈၵေႃႉလႄႈ ၼိုင်ႈၵေႃႉၼႆႉ ႁႅင်းၶၢမ်ႇတူဝ်ဢမ်ႇမိူၼ်ၵၼ်လႆႈ လႄႈ ပိူဝ်ႈတႃႇတေႁဵတ်းၵၢၼ် ၵုမ်းထိင်းၼမ်ႉၼၵ်းတူဝ်ၶိင်း ယွမ်းၵိၼ်ၶဝ်ႈၼမ်ႉတၢင်းၵိၼ် ဢၼ်ဝႃႈၼၼ်ႉ ပေႃးမီးႁႅင်းၶၢမ်ႇတူဝ်တဵမ်ထူၼ်ႈၸင်ႇႁဵတ်းပဵၼ်လႆႈ ၼၼ်ႉယဝ်ႉ။

👉👉👉တေႁဵတ်းႁိုဝ်ၵိၼ်ယႅမ်ႉ ႁႂ်ႈထုၵ်ႇမႅၼ်ႈၸွမ်းလၢႆးတၢင်းၵၢၼ်ၵုမ်းထိင်း

ၵူၼ်းၸိူဝ်းဢၼ်ဢမ်ႇမီး တၢင်းပဵၼ်ယဵဝ်ႈဝၢၼ် လိူတ်ႈသုင်ၼၼ်ႉ ပေႃးလုၵ်ႉမႃးၵၢင်ၼႂ်ၸဝ်ႉ ထုၵ်ႇလီၵိၼ်ပၼ် ၼမ်ႉသွင်ၵွၵ်း။ ယဝ်ႉၵေႃႈ ပၢၵ်ႈၸႂ်ဢၼ်မေႃထၢင်ႇထိူမ်ဝႃႈ ၵူဝ်ပီးၼၼ်ႉပႅတ်ႈသေ ၵိၼ်ပၼ် ႁႂ်ႈမီးႁႅင်းတဵမ်ထူၼ်ႈ။ လုၵ်ႉမႃးၵၢင်ၼႂ် ထုၵ်ႇလီၵိၼ်ပၼ် ၶဝ်ႈၼႂ် ၼႂ်းၶၢဝ်းတၢင်းမွၵ်ႈ ၼိုင်ႈၸူဝ်ႈမူင်း။ ၶဝ်ႈၼႂ်ၼၼ်ႉ ပေႃးၵႄႇလူဝ်ႇရီႇမၼ်းဢေႇႁႅင်းၵေႃႈ တေဢမ်ႇၸိုၼ်ႈသႂ်လႆႈတႃႇတင်းဝၼ်းၼၼ်ႉယဝ်ႉ။ ပေႃးၼမ်ႁႅင်းလူၼ်ႉၵေႃႈ တွင်ႉတေဢမ်ႇယူႇငၢႆႈမိူၼ်ၵၼ်။ ၵွပ်ႈၼၼ် ထုၵ်ႇလီၵိၼ်ပၼ် ႁႂ်ႈပဵင်းပေႃးၵွႆး ဢမ်ႇထုၵ်ႇလီၵိၼ်လူၼ်ႉၵိၼ်လိူဝ်။

တႃႇၶဝ်ႈဝၼ်းတႄႉ ၵိၼ်ပၼ် ၼိူဝ်ႉၵပ်းၶဝ်ႈလႆႈယူႇ။ ပေႃးပဵၼ်လႆႈ ဝႄႈပၼ်ဢၼ်ပႃးၼမ်ႉမၼ်းၼမ်ၼၼ်ႉ ၶႅမ်ႉတီႈသုတ်းယဝ်ႉ။ ပေႃးပဵၼ်ၽၵ်းဢၼ် ဢုပ်ႉၼမ်ႉမၼ်းဝႆႉၼၼ်ႉၸိုင် လိူၵ်ႈၵွၼ်ႉဢဝ်ၽၵ်းမၼ်းၵိၼ် ယႃႇၵွၼ်ႉပႃးၼမ်ႉမၼ်း။

💪💪💪ယႃႇၶၢမ်ႇဢိုပ်းၶဝ်ႈၶမ်ႈ

မၢင်ၸိူဝ်းၵူဝ်ပီး၊ ၵူဝ်ၼမ်ႉၼၵ်းၶိုၼ်ႈၼႆသေ ဢမ်ႇယွမ်းၵိၼ်ၶဝ်ႈၶမ်ႈၵၼ်။ လွင်ႈဝႄႈၶဝ်ႈၶမ်ႈပႅတ်ႈလုမ်းလုမ်း ဢမ်ႇၵိၼ်သေဢိတ်းၼႆႉ မိူၼ်တင်းဝႃႈ တိုၵ်းတေႃးပႅတ်ႈ ထၢတ်ႈၸီႇဝ ၼႂ်းတူၼ်တူဝ်ၸဝ်ႈၵဝ်ႇၼၼ်ႉယဝ်ႉ။ မိူဝ်ႈၽွင်း ၼႂ်းတွင်ႉၼႂ်းသႆႈဢမ်ႇမီးတၢင်းၵိၼ်ယႅမ်ႉသင်သေဢိတ်းၼၼ်ႉ ၵိၼ်ပၼ်ၼမ်ႉလၢႆလၢႆၵွႆး ဢမ်ႇၵုမ်ႇထူၼ်ႈလႆႈ။ သင်ဝႃႈ ဢမ်ႇၽိူမ်ႉပၼ်လႆႈၵ တၢင်းၵိၼ်ဢၼ်မီးဢႃႇႁႃႇရႁႂ်ႈပဵင်းပေႃး ပိူဝ်ႈတႃႇ ၵၢၼ်တူင်ႉၼိုင်ၼၼ်ႉ ဝၢႆးမႃးၸၢင်ႊလႆႈတၢင်းပဵၼ်မႃးၸွမ်းလၢႆလၢႆၵွႆး။ ထုၵ်ႇလီၵိၼ်ပၼ် တၢင်းၵိၼ်ယႅမ်ႉ ႁႂ်ႈမႅၼ်ႈၸွမ်းၶၢဝ်းယၢမ်း။ ၵၢၼ်ၸႂ်ႉလၢႆးတၢင်း လွင်ႈၵိၼ်ယႅမ်ႉသေ ထိင်းၼမ်ႉၼၵ်းၸဝ်ႈၵဝ်ႇၼႆႉ ပေႃးႁႅင်းၶၢမ်ႇၸဝ်ႈၵဝ်ႇတဵမ် ပဵင်းပေႃးလီၸင်ႇ တေၸၢင်ႊလူတ်းယွမ်းလႆႈၼမ်ႉၼၵ်းၼၼ်ႉယဝ်ႉ။

💓💓💓တေလႆႈၵိၼ်မၢၵ်ႇမႆႉမၢၵ်ႇတွၵ်ႇၶၢဝ်းလႂ်

မၢင်ၸိူဝ်းသမ်ႉ တႅၼ်းတၢင်ၶဝ်ႈၶမ်ႈၼၼ်ႉ ၵိၼ်ပၼ်မၢၵ်ႇမႆႉ။ သၽႃႇဝမၢၵ်ႇမႆႉၼႆႉ မီးၼမ်ႉၸဵမ်း၊ ပႃးထၢတ်ႈၵိူဝ်ဝၢၼ်ၼမ်မွၵ်ႈၵႃႊႁိုဝ်ၼႆ ဢမ်ႇၸၢင်ႊၼပ်ႉလႆႈလႄႈ ပေႃးၵိၼ်ပၼ် ၵၢင်ဝၼ်းတႄႉ တေတိူဝ်းၶႅမ်ႉလိူဝ်ယူႇ။ သင်ၵိၼ်မၢၵ်ႇမႆႉ ဢၼ်သုၵ်း၊ ဢၼ်ၸဵမ်းၸိုင် ၸၢင်ႊႁဵတ်းႁႂ်ႈၵူၼ်းႁဝ်းပီးၶိုၼ်ႈၼႆ ၵမ်ႈၼမ်ၼႆႉ ဢမ်ႇၾၢင်ႉမႅၼ်ႈၵၼ်မႃး။

👉👉👉ပေႃးၼၼ်တေလႆႈႁဵတ်းၸိူင်ႉႁိုဝ်👌👌👌👌

ၵူၼ်းၸိူဝ်းၶႂ်ႈပီးသမ်ႉ ၵိၼ်ပၼ်ၼိူဝ်ႉ ဢၼ်ပႃးထၢတ်ႈပရူဝ်ႇတိင်းၼၼ်ႉၼမ်ၼမ်။ ပေႃးၵိၼ်တၢင်းၵိၼ်ယဝ်ႉ ထုၵ်ႇလီၵိၼ်ၼမႉ်ၸွမ်းၵမ်းလဵဝ်။ တွၼ်ႈတႃႇ ၵူၼ်းၸိူဝ်းၶႂ်ႈယွမ်ၼၼ်ႉသမ်ႉ ထုၵ်ႇလီၵိၼ်ပၼ် မၢၵ်ႇမႆႉၼမ်ၼမ်။ ၵွၼ်ႇပႆႇၵိၼ်ၶဝ်ႈၼၼ်ႉ ထုၵ်ႇလီၵိၼ်ပၼ်ၼမ်ႉဢွၼ်တၢင်း။ ၵၢၼ်ၵိၼ်ၼမ်ႉပၼ်ႁႂ်ႈဢိမ်ႇပဵင်းပေႃး ဢွၼ်တၢင်းမိူဝ်ႈတေၵိၼ်တၢင်းၵိၼ်ၼၼ်ႉ ၸၢင်ႊႁဵတ်းႁႂ်ႈ ဢမ်ႇၵိၼ်လႆႈ တၢင်းၵိၼ်ယႅမ်ႉၶဝ်ႈၵႂႃႇၼႂ်းတွင်ႉ ၼမ်ၼမ် ၸွမ်းၼင်ႇႁဝ်းၶႂ်ႈၵိၼ်ၼၼ်ႉ။ ထႅင်ႈလွင်ႈ႞ၵေႃႈ ထုၵ်ႇလီဝႄႈ ၼမ်ႉဝၢၼ်၊ ၼမ်ႉၸဵမ်း၊ ပီႇယႃႇ၊ လဝ်ႈ ၸဵမ်ၸိူဝ်းၼႆႉ။