မိူဝ်ႈတေယွမ်းၵၢၼ်ႉသုမ်းၼၼ်ႉ ဝူၼ်ႉႁၼ်ၶေႃႈၸိူဝ်းၼႆႉဢွၼ်တၢင်းၵွၼ်ႇလႄႈ
ႁိူဝ်ႉမွႆႈယူႇၵေႃႈယဝ်ႉ ယႃႇပေယွမ်းၵၢၼ်ႉသုမ်းသေလူမ်ႉၵႂႃႇပႅတ်ႈ၊ တူၺ်းၶိုၼ်း၊ ဝူၼ်ႉႁၼ်ၶိုၼ်း ၼႃႈတႃ ပေႃႈမႄႈ ပီႈၼွင်ႉၸိူဝ်ႉၶိူဝ်းဢၼ်ႁၵ်ႉသူၼၼ်ႉသေ ၶတ်းၸႂ်ၸိုၼ်ႇလုၵ်ႉၶိုၼ်းလႄႈ။ ပၼ်ၾၢင်ႉၸဝ်ႈၵဝ်ႇဝႃႈ လွင်ႈၸိူဝ်းဢၼ်ႁူပ်ႉမႃးၼႆႉ ဢမ်ႇၸႂ် လွင်ႈယၢပ်ႇသင်လူင်လၢင် တွၼ်ႈတႃႇၵဝ်ၼႆသေ ၶတ်းၸႂ် ၶၢမ်ႈပူၼ်ႉၵႂႃႇလႄႈ။
ယွၼ်ႉလွင်ႈႁိူဝ်ႉမွႆႈၼၼ်ႉေသ တေပွႆႇပႅတ်ႈလွင်ႈတၢင်းၵူႊလွင်ႈလွင်ႈယဝ်ႉႁႃႉ
ဢၼ်သူပွႆႇပႅတ်ႈၼၼ်ႉ ဢမ်ႇၸႂ်ႈဝႃႈပဵၼ်လွင်ႈတၢင်းမၢင်လွင်ႈသႄႈ
သူပွႆႇပႅတ်ႈ တူဝ်သူၵွႆးဢိူဝ်ႈ။
သုၵ်ႉၸႂ်ၼႆသေ ယႃႇၵုမ်ႉပွင်ႉၶင်းလူၺ်ႈဢမ်ႇပဵင်းပေႃးၸႂ်ယူႇလႄႈ။ သူပဵၼ်ၽႂ်ၼႆတႄႉ ၽြႃးပဵၼ်ၸဝ်ႈသူႇလႂ်ၵေႃႈတေဢမ်ႇႁူႉၼင်ႇၵဝ်ႇ။ ၵူၺ်းၵႃႈ တႃႇၸၢတ်ႈပၢၼ်ဢၼ်သူလႆႈဝႆႉယူႇယၢမ်းလဵဝ်ၼႆႉတႄႉ ထုၵ်ႇလီယူႇၵဝ်းၵႂႃႇ ႁႂ်ႈမီးတၢင်းသိူဝ်းၸႂ်ယူႇ။ သိူဝ်းၸွမ်း ၵၢၼ်ဢၼ်ၸဝ်ႈၵဝ်ႇလႆႈႁဵတ်းယူႇ ယၢမ်းလဵဝ်ၼၼ်ႉ လီသေပိူၼ်ႈယဝ်ႉ။
ယွၼ်ႉပိူၼ်ႈ ဢၼ်ပဵၼ်တၢင်ႇၵေႃႉၼၼ်ႉ ၸွမ်းယႃႉၵဝ်း ႁဵတ်းႁၢႆႉၼိူဝ်သူၵူႊလွင်ႈ ၵူႊၽၢႆႇသေယဝ်ႉ ယႃႇၵိုင်ႉၵၢင်ႉၵူမ်ႈႁူဝ်သေ ၸႂ်လဵၵ်ႉၵႂႃႇၵမ်းလဵဝ်။ ၵူၼ်းႁဝ်း ၵိူတ်ႇမႃး ဢမ်ႇၸႂ်ႈဝႃႈ မီးလွင်ႈတဵမ်ထူၼ်ႈမႃးၸဵမ်မိူဝ်ႈၵိူတ်ႇၵူႊၵေႃႉ။ ၵူၺ်းၵႃႈ ၶတ်းၸႂ် ႁဵတ်းသၢင်ႈၵႂႃႇ ၵူႊလွင်ႈလွင်ႈ ၸွမ်းၼင်ႇၸဝ်ႈၵဝ်ႇ ပွင်ပဵၼ်လႆႈၼၼ်ႉ လီတီႈသုတ်းယဝ်ႉ။
ယႃႇၵမ်းၵမ်းၵုမ်ႇ ဝူၼ်ႉ၊ လၢတ်ႈဝႃႈ ၸဝ်ႈၵဝ်ႇၼႆႉ ဢမ်ႇမီးဢူၺ်းၵေႃႉ၊ ဢမ်ႇမီးၽႂ်ႁၵ်ႉသေ လႆႈၵိုတ်းငဝ်ယူႇၵေႃႉလဵဝ်၊ ထုၵ်ႇပွႆႇပႅတ်ႈဝႆႉၵေႃႉလဵဝ်ၼႆလႄႈ။ သူပႆႇလႆႈယူႇၵေႃႉလဵဝ်သႄႈ၊ ၵူၼ်းၸိူဝ်းဢၼ်ယူႇႁိမ်းၸမ်သူၵူႊၶၢဝ်းၼၼ်ႉ မီးပေႃႈမႄႈ၊ ပီႈၼွင်ႉ၊ ဢူၺ်းၵေႃႉဢူၺ်းသေႈယူႇ။
ၽၢႆႇၼိုင်ႈၵေႃႈ ယႃႇဝူၼ်ႉဝႃႈ ၸဝ်ႈၵဝ်ႇၼႆႉ လမ်ႇလွင်ႈ လႄႈ လွင်ႈယႂ်ႇတႃႇၵူႊၵေႃႉ၊ ၵူႊတီႈၵူႊတၢင်း။ ယွၼ်ႉဝႃႈ မၢင်လွင်ႈၼႆႉ ဢမ်ႇမီးသူၵေႃႉၼိုင်ႈၵေႃႈ ပိူၼ်ႈႁဵတ်းပဵၼ်လႆႈၵႂႃႇႁင်းၵွႆးယူႇၼႆ ယႃႇပေလိုမ်း။ လုမ်ႈၾႃႉၵေႃႈၼင်ႇၼၼ်ယဝ်ႉ ဢမ်ႇမီးသူၵေႃႉၼိုင်ႈ ၵေႃႉလဵဝ်ၵွႆးၵေႃႈ မၼ်းတႄႉ တိုၼ်းပၼ်ႇသေ သိုပ်ႇႁဵတ်းၵၢၼ်မၼ်းၵႂႃႇယူႇၵူႊၶၢဝ်းၼၼ်ႉယဝ်ႉ။
ဝႃႈၼၼ်သေတႃႉ ယႃႇဝူၼ်ႉဝႃႈ ၸဝ်ႈၵဝ်ႇၼႆႉ ဢမ်ႇလွင်ႈယႂ်ႇ၊ ဢမ်ႇလမ်ႇလွင်ႈလႄႈ။ ယွၼ်ႉဝႃႈ သူၼႆႉ လမ်ႇလွင်ႈ လႄႈ လွင်ႈယႂ်ႇတႃႇ ပေႃႈမႄႈသူၼၼ်ႉယဝ်ႉ။ ၸၢတ်ႈပၢၼ်သူၵေႃႈ မိူၼ်ၵၼ်တင်းပဵၼ် ၸၢတ်ႈပၢၼ်တႃႇပေႃႈမႄႈသူၼၼ်ႉယဝ်ႉ။ ပေႃးသူမီးတၢင်းၸိူဝ်းၸႂ်ၵွၼ်ႇ ပေႃႈမႄႈသူၵေႃႈ တေမီးတၢင်းသိူဝ်းၸႂ်ၸွမ်းသေ မိူင်းၵူၼ်းၵေႃႈ တေမီးတီႈပွင်ႇ လႄႈ ႁၢင်ႈလီတႃႇၶဝ်ၼၼ်ႉၼႆ ယႃႇပေလိုမ်းလႄႈ။
ပဵၼ်သင်မႃးၵေႃႈလီ ႁူပ်ႉသင်မႃးၵေႃႈယဝ်ႉ တိုၼ်းယႃႇပေ ၸႂ်လဵၵ်ႉၵႂႃႇသေၵမ်း။ ယႃႇၸႂ်လဵၵ်ႉ ယႃႇယွမ်းၵၢၼ်ႉသုမ်းသေ ၶတ်းၸႂ် ဝူၼ်ႉႁၼ်ပဵၼ်လွင်ႈလီၵူႊၶၢဝ်းၼၼ်ႉ တေလီတႃႇၸၢတ်ႈပၢၼ်သူယဝ်ႉ။ ၵၢၼ်တီႈဢၼ်ဝႃႈ ၸႂ်လဵၵ်ႉၼႆၼၼ်ႉ ပဵၼ်ၶေႃႈလိင်ႉ တႃႇလွင်ႈတၢင်းၶၢၼ်ႉမဵဝ်းၼိုင်ႈယဝ်ႉ။
မိူဝ်ႈသူပႆတၢင်းၼၼ်ႉ ၾၢင်ႉတူၺ်းပၼ် တူၼ်ႈယိူဝ်ႈ ဢၼ်သူယဵပ်ႇပႆၼိူဝ်မၼ်းၵႂႃႇၵူႊဝၼ်းၼၼ်ႉလႄႈ။ ၾၢင်ႉတူၺ်းပၼ်ပႃး တူၼ်ႈမႆႉ၊ မႂ်မႆႉမႂ်တွၵ်ႇ၊ တူၼ်ႈမွၵ်ႇ၊ တူၼ်ႈမၢၵ်ႇ ဢၼ်မီးႁိမ်းႁွမ်းသူၼၼ်ႉၵူႊဝၼ်းလႄႈ။ တေႃႈၼင်ႇၶဝ် ယင်းၶတ်းၸႂ်ၸိုၼ်ႇလုၵ်ႉ တႃႇၶဝ်တေမီးတၢင်းႁၢင်ႈလီ ၼႂ်းၸၢတ်ႈပၢၼ်ဢၼ်ဢမ်ႇမိူၼ်ပိူၼ်ႈၼၼ်ႉယူႇ။ ယွၼ်ႉၼၼ် ၸဝ်ႈၵဝ်ႇသမ်ႉပဵၼ်ၽႂ်လႄႈ တေႁဵတ်းႁႂ်ႈ ၸၢတ်ႈပၢၼ်ၸဝ်ႈၵဝ်ႇ ဢမ်ႇမီးတၢင်းသိူဝ်းၸႂ်လႆႈၶႃႈလႃႇ။
သဵၼ်ႈတၢင်းယၢပ်ႇတၢၼ်ႇႁိုဝ်ၵေႃႈယဝ်ႉ ၶတ်းၸႂ်သိုပ်ႇယၢင်ႈပႆ ဢဝ်လွင်ႈတၢင်းယုမ်ႉသေ ၶၢမ်ႈပူၼ်ႉမၼ်းၵႂႃႇႁႂ်ႈလႆႈလႄႈ။ သင်ဝႃႈ လွင်ႈတၢင်း 10 လွင်ႈႁဵတ်းႁႂ်ႈသူ တူၵ်းၼမ်ႉတႃၸိုင် ၶိုၼ်းၶတ်းၸႂ် ယုမ်ႉတေႃႇ လွင်ႈတၢင်းသုၵ်ႉ 100 လွင်ႈၼၼ်ႉသေ တေႃႇသူႈၸၢတ်ႈပၢၼ်ၵႂႃႇလႄႈ။
Comments
Post a Comment