ပၼ်ႁႃၵူႊဢၼ်တိုၼ်းမီးၶေႃႈတွပ်ႇ သွၵ်ႈႁႃလႆႈသဵၼ်ႈတၢင်းဢွၵ်ႇယူႇ
တႃႇၸုၵ်းမၼ်ႈလႆႈၼိူဝ်တိၼ်ၸဝ်ႈၵဝ်ႇ၊ တႃႇပူၵ်းပွင်ၸၢတ်ႈပၢၼ်တူဝ်ၵဝ်ႇ ႁႂ်ႈၶိုတ်းၸၼ်ႉၶိုၼ်ႈသုင် ၼႆသေ ၵူၼ်းၵူႊၵေႃႉဢွၼ်ၵၼ်ၶတ်းၸႂ်ႁဵတ်းၵၢၼ်ႁင်းၽႂ်မၼ်း။ ၵူၼ်းၸိူဝ်းမီးတိုဝ်ႉတၢင်းလႆႈၶိုၼ်းႁူင်းႁဵၼ်း ႁဵၼ်းသွၼ်လိၵ်ႈလၢႆးၵေႃႈ ၸႂ်ႉဢွၵ်းဢေႃၺၢၼ်ႇတူဝ်ၵဝ်ႇသေႁဵတ်းၵၢၼ်၊ ၵူၼ်းၸိူဝ်းဢမ်ႇပွင်ပဵၼ်လႆႈ ဢၼ်ဢဝ်ၺၢၼ်ႇဢွၵ်းဢေႃႇသေ ႁဵတ်းၵၢၼ်ၵေႃႈ ၸွမ်းၼင်ႇတူဝ်ၵဝ်ႇပွင်ပဵၼ်လႆႈၼၼ်ႉ ၸႂ်ႉဢဵၼ်ႁႅင်းတူဝ်သေ ႁဵတ်းၵၢၼ်။ ၸိူဝ်းဢဝ်ဢွၵ်းဢေႃၺၢၼ်ႇပၺ်ႇၺႃႇသေ ႁဵတ်းၵၢၼ်ၵေႃႈ ၶဝ်ဝႃႈ ၵၢၼ်ဢၼ်ၼႆႉ ယွၼ်ႉဢမ်ႇလႆႈၸႂ်ႉႁႅင်းတူဝ် ဢွၵ်ႇႁိူဝ်ႇ ဢွၵ်ႇၶႆးလႄႈ သၢၵ်ႈသႃႇလိူဝ် ၵၢၼ်ဢၼ်လႆႈၸႂ်ႉႁႅင်းတူဝ်သေ ႁဵတ်းၵၢၼ်ဢၼ်ဢွၵ်ႇႁိူဝ်ႇဢွၵ်ႇၶႆး ၼႆယူႇ။ ၵူၺ်းၵႃႈၸိူင်ႉႁိုဝ်ၵေႃႈလီ ၸႂ်ႉလွၵ်းလၢႆးဢၼ်လႂ် ႁဵတ်းၵၢၼ်သင်ၵေႃႈယဝ်ႉ လွင်ႈၶမ်ၸႂ် လွင်ႈၼၵ်းၸႂ် ႁိူဝ်ႉၸႂ် ဢၼ်ဝႃႈၼၼ်ႉတႄႉ မၼ်းတိုၼ်းမီးယူႇ ႁင်းၽႂ်မၼ်း။ ပေႃးထူပ်းလွင်ႈၶမ်ၸႂ် လွင်ႈၼၵ်းၸႂ် လွင်ႈႁိူဝ်ႉၸႂ် ၸိူင်ႉၼႆမႃးၸိုင် ယႃႇပေဝူၼ်ႉဝႃႈ မီးၸဝ်ႈၵဝ်ႇၵေႃႉလဵဝ်ၵွႆး ထူပ်းၺႃးလွင်ႈၸိူင်ႉၼႆ။ ပၼ်ႁႃဢၼ်ၼႆႉ ၵူၼ်းၵူႊၵေႃႉဢၼ်ႁဵတ်းၵၢၼ် တိုၼ်းလႆႈထူပ်းၺႃးၵူႊၵေႃႉသေ တေပိူင်ႈၵၼ်ၵႂႃႇ ၶၢဝ်းယၢမ်း ဢၼ်လႆႈထူပ်းမၼ်းၵွႆး။ တႃႇႁႂ်ႈမီးလွင်ႈသိူဝ်းၸႂ်ၵူႊၶၢဝ်းယၢမ်း ၼႂ်းတူင်ႇဝူင်းၵၢၼ် ဢၼ်ၸဝ်ႈၵဝ်ႇႁဵတ်းၼၼ်ႉ မၼ်းဢမ်ႇငၢႆႈသႄႈ။
ယွၼ်ႉၼၼ်ႉ ပေႃးၶႂ်ႈႁႂ်ႈလွင်ႈၼၵ်းၸႂ် လွင်ႈၶမ်ၸႂ် လွင်ႈႁိူဝ်ႉၸႂ် ဢၼ်လႆႈမႃးၼႂ်းၼႃႈၵၢၼ်ၸဝ်ႈၵဝ်ႇ ၼၼ်ႉလူတ်းယွမ်းသေ ႁႂ်ႈၸၢတ်ႈပၢၼ်တူဝ်ၵဝ်ႇသိူဝ်းၸွမ်းလႆႈၼႂ်းတူင်ႇဝူင်းၵၢၼ်ၸဝ်ႈၵဝ်ႇၼၼ်ႉၸိုင် တေလႆႈႁူႉလွၵ်းလၢႆးၵႄႈလိတ်ႈပၼ်ႁႃ လွင်ႈၶမ်ၸႂ် လွင်ႈၼၵ်းၸႂ်လူင် ၸိူဝ်းၼႆႉယူႇ။
လွင်ႈၼၵ်းၸႂ် လွင်ႈသုၵ်ႉၸႂ် လွင်ႈၶမ်ၸႂ် ဢၼ်လႆႈမႃးယွၼ်ႉၼႃႈၵၢၼ်တူဝ်ၵဝ်ႇၼၼ်ႉ ၸၢင်ႊႁဵတ်းႁႂ်ႈတုမ်ႉတိူဝ်ႉ ၸၢတ်ႈပၢၼ်ၵူႊၸဝ်ႉၼႂ်ဝၼ်းၶမ်ႈတူဝ်ၵဝ်ႇပႃးထႅင်ႈ။ တေၸၢင်ႈတုမ်ႉတိူဝ်ႉၵၢၼ် ၵပ်းသိုပ်ႇသၢၼ် လွင်ႈမိုတ်ႈၵိုဝ်းဢူၺ်းၵေႃႉ လႄႈ ၼႃႈၵၢၼ်တႃငၢၼ်းတူဝ်ၵဝ်ႇသေဢမ်ႇၵႃး လမ်ႇလွင်ႈသုတ်းတႄႉ ၸၢင်ႊတုမ်ႉတိူဝ်ႉ ပၢႆးယူႇလီၸဝ်ႈၵဝ်ႇ ၼၼ်ႉယဝ်ႉ။
လွင်ႈဢၼ်ၸၢင်ႊႁဵတ်းႁႂ်ႈမီးလွင်ႈၶမ်ၸႂ်ၼၼ်ႉ
- ငိုၼ်းလိူၼ်ဢေႇ
- လႆႈႁၢပ်ႇပုၼ်ႈၽွၼ်းၼႂ်းၼႃႈၵၢၼ်ၼမ်လိူဝ်
- တိုဝ်ႉတၢင်းဢၼ်တေႁဵတ်းႁႂ်ႈၸၢတ်ႈပၢၼ်ၸဝ်ႈၵဝ်ႇၶိုၼ်ႈယႂ်ႇဢေႇ
- ဢမ်ႇလႆႈတူဝ်ထူပ်းမႂ်ႇ ၼႂ်းၼႃႈၵၢၼ်
- ထုၵ်ႇဢိုတ်းတိုဝ်ႉတၢင်း သုၼ်ႇလႆႈႁဵတ်းသၢင်ႈ
- တီႈတူင်ႇဝူင်းၼႃႈၵၢၼ် ဢမ်ႇမီးလွင်ႈၽဵင်ႇပဵင်း
- ဢမ်ႇမီးၵၢၼ်ၸွႆႈထႅမ်ၵၼ် ၼႂ်းၼႃႈၵၢၼ်
- ဢမ်ႇသူၼ်ၸႂ် လွင်ႈၼႃႈၵၢၼ် ၸဵမ်ၸိူဝ်းၼႆႉ။
သင်ဢမ်ႇၵုမ်းထိင်းလႆႈ လွင်ႈၶမ်ၸႂ် လွင်ႈသုၵ်ႉၸႂ် ဢၼ်ပဵၼ်မႃးတီႈၼႃႈၵၢၼ်ၼၼ်ႉၸိုင် ၸၢင်ႊတုမ်ႉတိူဝ်ႉပၢႆးယူႇလီတူဝ်ၵဝ်ႇ။ လွင်ႈၶမ်ၸႂ်/သုၵ်ႉၸႂ်/ ၼၵ်းၸႂ်ၼႆႉ ၵူၼ်းၵူႊၵေႃႉၸၢင်ႊႁူပ့်ၺႃးလႄႈ သင်လွင်ႈပၼ်ႁႃဢၼ်ၼႆႉ ယႂ်ႇၶိုၼ်ႈမႃးၸိုင် ၸၢင်ႊတုမ်ႉတိူဝ်ႉပႃးလွင်ႈႁဵတ်းတၢင်းသၢင်ႈၵၢၼ် ဢၼ်ႁဵတ်းယူႇၵူႊမိုဝ်ႉဝၼ်းၼၼ်ႉၼမ်မႃးတိၵ်းတိၵ်း။ လွင်ႈၼၵ်းၸႂ် လွင်ႈၶမ်ၸႂ်ၼႆႉ ယွၼ်ႉဢမ်ႇႁၢႆလႆႈငၢႆႈငၢႆႈလႄႈ ယၢပ်ႇယူႇ။ ၵူၺ်းၵႃႈ သင်ဢမ်ႇမေႃဢဝ်သႂ်ႇၸႂ်ဝႆႉတႄႉ တေတိူဝ်းလီယူႇ။ ပေႃးတေဢဝ်လွင်ႈၶမ်ၸႂ် လွင်ႈသုၵ်ႉၸႂ်ၸိူဝ်းၼႆႉ သႂ်ႇၸႂ်ယူႇတိၵ်းတိၵ်းၸိုင် ၸၢင်ႊတုမ်ႉတိူဝ်ႉပႃး ၼႂ်းၼႃႈႁိူၼ်းတူဝ်ၵဝ်ႇၵွၼ်ႇ။
ပၼ်ႁႃဢၼ်ၸၢင်ႊပဵၼ်မႃးလူၺ်ႈ လွင်ႈၶမ်ၸႂ်
ပေႃးႁူပ်ႉလွင်ႈၶမ်ၸႂ် လွင်ႈၼၵ်းၸႂ် ၼႂ်းၼႃႈၵၢၼ်ၼမ်မႃးၸိုင် တေၸၢင်ႊထူပ်းပၼ်ႁႃမိူၼ်ၼင်ႇ ႁူဝ်ၶႆႈ၊ တွင်ႉဢဵဝ်ႈ၊ ၼွၼ်းဢမ်ႇဢိမ်ႇ၊ ၸႂ်လမ်ငၢႆႈသေ ပဵၼ်ၸႂ်ပိတ်းၸႂ်ပွတ်း သေဢမ်ႇၵႃး တႃႇတေမီးလွင်ႈပၵ်းၸႂ်ၼိူဝ်ၵၢၼ်ၵေႃႈ ယၢပ်ႇယဵၼ်းမႃး။ လိူဝ်ၼၼ်ႉ တေၸၢင်ႊပဵၼ်ပၼ်ႁႃယႂ်ႇလူင် ၼႂ်းၵၢၼ်ပၢႆးယူႇလီထႅင်ႈလူးၵွၼ်ႇ။
မိူၼ်ၼင်ႇပိူၼ်ႈဢွၼ်ၵၼ်လၢတ်ႈဝႃႈ တတ်းၾႆးႁေႉႁူဝ်လူမ်းၼႆႉ လီလိူဝ်ဢၼ်တေပႂ်ႉဢဝ်ၼမ်ႉႁူတ်းၾႆးႁႂ်ႈမွတ်ႇၼၼ်ႉၼႆလႄႈ ၼင်ႇႁိုဝ်တေဢမ်ႇပဵၼ်ပၼ်ႁႃယႂ်ႇလူင် ၼႂ်းၵၢၼ်ပၢႆးယူႇလီၸဝ်ႈၵဝ်ႇၼၼ်ႉ ဢွၼ်ၵၼ်ႁေႉႁၢမ်ႈ ၾၢင်ႉဝႆႉၵွၼ်ႇပႂ်ႇပဵၼ်ၼၼ်ႉ တေလီယူႇ။
ယွၼ်ႉလွင်ႈၼၵ်းၸႂ်ေသ ပၼ်ႁႃဢၼ်ၸၢင်ႊပဵၼ်မႃးတီႈတူၼ်တူဝ်ၸဝ်ႈၼၼ်ႉၼၼ်ႉမီးယူႇတင်းၼမ်။ မိူၼ်ၼင်ႇ ပဵၼ်လွင်ႈၸႂ်တူၵ်း၊ ၼွၼ်းဢမ်ႇလပ်း၊ တၢင်းပဵၼ်လိူတ်ႈၶိုၼ်ႈ၊ ႁႅင်းၶၢမ်ႇတူဝ်ယွမ်းလူင်း၊ တူဝ်ၶိင်းပီးၶိုၼ်ႈသေဢမ်ႇၵႃး ေတၸၢင်ႊၸပ်းတၢင်းပဵၼ်ႁူဝ်ၸႂ် ၼႆယဝ်ႉ။
မၢင်ၸိူဝ်းသမ်ႉ ယွၼ်ႉတီႈၼႃႈၵၢၼ်မီးလွင်ႈၼၵ်းၸႂ်လႄႈ ၼင်ႇႁိုဝ်တေပဵၼ်ၵၢၼ်ၵႄႈလိတ်ႈၼၼ်ႉ ၵိၼ်တၢင်းၵိၼ်ၼမ်လူၼ်ႉ၊ မၢင်ၸိူဝ်းသမ်ႉ ဢမ်ႇယွမ်းၵိၼ်သင်၊ မၢင်ၸိူဝ်းသမ်ႉ ႁူႉယူႇဝႃႈ တၢင်းၵိၼ်ဢၼ်ၼႆႉ ဢမ်ႇမႅၼ်ႈၸွမ်းပၢႆးယူႇလီၵေႃႈ ၵိၼ်ယူႇတိၵ်းတိၵ်း၊ လုတ်ႇလႅၼ်းယႃႈ ၊ ၵိၼ်လဝ်ႈ၊ မၢင်ၸိူဝ်းသမ်ႉၸႂ်ႉတိုဝ်းယႃႈမဝ်းၵမ်။ ၸိူဝ်းၼႆႉ ပဵၼ်လၢႆးၶႃတူဝ်ၶႃၸႂ်တူဝ်ၵဝ်ႇၵွႆး၊ ဢမ်ႇၸႂ်ႈလၢႆးၵႄႈပၼ်ႁႃလွင်ႈၶွင်ႈၶမ် လွင်ႈၼၵ်းၸႂ် လွင်ႈၶမ်ၸႂ်သင်ၼႆ ထုၵ်ႇလီႁူႉၵၼ်ယူႇ။
ပၼ်ႁႃၵူႊလွင်ႈၼႆႉ မၼ်းတိုၼ်းမီးၶေႃႈတွပ်ႇ
ၵူၼ်းၼႆႉ ပဵၼ်သတ်ႉတဝႃႇ ဢၼ်မီးတၢင်းႁူႉၺၢၼ်ႇတၢင်းဝူၼ်ႉ ၼမ်လိူဝ်ပိူၼ်ႈသေ မီးၼမ်ႉၵတ်ႉတႃႇတေၵႄႈလိတ်ႈပၼ်ႁႃဝႆႉၼႂ်းတူဝ်ႁင်းၽႂ်မၼ်းၼႆ ဢမ်ႇထုၵ်ႇလီလူင်လိုမ်းၵၼ်လႃးလႃး။ ႁဝ်းၶႃႈၵွႆးလူဝ်ႇမေႃၸႂ်ႉတိုဝ်းမၼ်းၵွႆး။ ယွၼ်ႉၼၼ် သင်ဝႃႈၸဝ်ႈၵဝ်ႇမီးလွင်ႈၶမ်ၸႂ်/ သုၵ်ႉၸႂ်/ ၼၵ်းၸႂ်မႃးၼႆၸိုင် ဝူၼ်ႉႁၼ်ထိုင်လွင်ႈတၢင်း ၶေႃႈဢၼ်ႁဝ်းလႆႈပဵၼ် လွင်ႈၼၵ်းၸႂ် ယွၼ်ႉမၼ်းၼၼ်ႉဢွၼ်တၢင်းၼၼ်ႉ တေလီယူႇ။
လွင်ႈတၢင်းဢၼ်ႁဝ်းပဵၼ်လွင်ႈၼၵ်းၸႂ်ယွၼ်ႉမၼ်းၼၼ်ႉ ၸွင်ႇမၼ်းလမ်ႇလွင်ႈ၊ မၼ်းလမ်ႇလွင်ႈထိုင်ၸၼ်ႉလႂ်၊ ပေႃးတေၵုမ်ႇဝႆႉလွင်ႈၼၵ်းၸႂ်ၸိူင်ႉၼႆ တေၸၢင်ႊမီးလွင်ႈတုမ်ႉတိူဝ်ႉၸိူင်ႉႁိုဝ်လၢႆလၢႆၼႆ ထုၵ်ႇလီဝူၼ်ႉၶွပ်ႈသွၵ်ႈႁႃ ၶေႃႈမုၼ်းၸိူဝ်းၼႆႉလီလီသေ တႅပ်းတတ်းႁဵတ်းသၢင်ႈၵႂႃႇယူႇ။
ပေႃးဝူၼ်ႉထတ်းသၢင်လႆႈလွင်ႈတၢင်းၸိူဝ်းၼႆႉလီငၢမ်းယဝ်ႉၸိုင် တႃႇတေၵေႈလိတ်ႈပၼ်ႁႃ လွင်ႈၼၵ်းၸႂ် / လွင်ႈၶမ်ၸႂ်/ လွင်ႈသုၵ်ႉၸႂ်ၼၼ်ႉ သင်ႁဵတ်းသၢင်ႈပၼ် လွင်ႈတူင်ႉၼိုင် မိူၼ်ၼင်ႇ ဢွၵ်ႇပႆတၢင်း၊ သုတ်ႇလူမ်းၵတ်းလူမ်းယဵၼ် ႁိမ်းႁွမ်းဢွင်ႈတီႈမီးပႃႇမႆႉသီၶဵဝ် ဢမ်ႇၼၼ် တႅမ်ႈလူင်း လွင်ႈတၢင်းဢၼ်ႁဵတ်းႁႂ်ႈၸဝ်ႈၵဝ်ႇပဵၼ်လွင်ႈၼၵ်းၸႂ်ၼၼ်ႉ သဵင်ႈသဵင်ႈ၊ ဢၢၼ်ႇပပ်ႉလိၵ်ႈ၊ ႁဵတ်းပၼ်လွင်ႈတူင်ႉၼိုင်တူဝ်သေလွင်ႈလွင်ႈ ဢၼ်တေၸၢင်ႊႁဵတ်းႁႂ်ႈ မီးလွင်ႈၸႂ်ၸိုၼ်ႈပၢင်ႇ၊ ႁဵတ်းၸွမ်းၼင်ႇဝႃႇသၼႃႇတၢင်းသူင်ၸဝ်ႈၵဝ်ႇ၊ ႁဵတ်းပၼ်လွင်ႈတူင်ႉၼိုင်ၸွမ်း ၵူၼ်းၼႂ်းၼႃႈႁိူၼ်းၸဝ်ႈၵဝ်ႇ လႄႈ ပိုတ်ႇလၢတ်ႈၼႄလွင်ႈတၢင်းၵူႊလွင်ႈ ဢၼ်ႁဵတ်းႁႂ်ႈၸဝ်ႈၵဝ်ႇမီးလွင်ႈၼၵ်းၸႂ်ၼၼ်ႉ တီႈၵူၼ်းဢၼ်ၸဝ်ႈၵဝ်ႇယုမ်ႇယမ်တမ်းၸႂ်ၼၼ်ႉ ၸဵမ်ၸိူဝ်းၼႆႉ။
လိူဝ်ၼၼ်ႉ ၼင်ႈတြႃးၼိမ်တူဝ်ၼိမ်ၸႂ်ပၼ်ယဝ်ႉ သုတ်ႇလူမ်းၶဝ်ႈလူမ်းဢွၵ်ႇသေ ၽႄမႅတ်ႉတႃႇပၼ်တႃႇသတ်ႉတဝႃႇတင်းသဵင်ႈ ဢမ်ႇၼၼ် ၽွင်းၶၢဝ်းၵၢင်ဝၼ်း ႁိုဝ် ၽွင်းမီးလွင်ႈၼၵ်းၸႂ်ၼၼ်ႉ ထုၵ်ႇလီၵႂႃႇလိုဝ်ႉႁိူဝ်ႉပၼ်ၸူဝ်ႈၵႅပ်ႉ တီႈဢၼ်ဢမ်ႇမီးလွင်ႈဢူၼ်မေႃးသုၵ်ႉယုင်ႈၼၼ်ႉယူႇ။ ဢၼ်လမ်ႇလွင်ႈသုတ်းတႄႉ ထုၵ်ႇလီလိုမ်းဝႆႉၵူႊၸိူဝ်ႉၵူႊလွင်ႈၸူဝ်ႈၵႅပ်ႉသေ ၼွၼ်းပၼ်ႁႂ်ႈတႃၼွၼ်းဢိမ်ႇယဝ်ႉ ၸင်ႇသိုပ်ႇႁဵတ်းၼႃႈၵၢၼ်ဢၼ်လူဝ်ႇႁဵတ်းသၢင်ႈၵႂႃႇထႅင်ႈၼၼ်ႉ ၶႅမ်ႉတီႈသုတ်းယဝ်ႉ။
ဢဝ်လွၵ်းလၢႆးၸိူဝ်းၼႆႉသေ ယူတ်းယႃလႆႈတၢင်းပဵၼ်လွင်ႈၼၵ်းၸႂ် လႆႈယူႇ။ ၵူၼ်းၸိူဝ်းဢၼ်ႁဵတ်းလွင်ႈတူင်ႉၼိုင်တူဝ်ၶိင်းၵူႊမိုဝ်ႉဝၼ်းၼႆႉ မီးၼမ်ႉၵတ်ႉတႃႇၵေႈလိတ်ႈပၼ်ႁႃ လွင်ႈၼၵ်းၸႂ် ၶႅမ်ႉတီႈသုတ်းယဝ်ႉ။ ယွၼ်ႉၼၼ် ယုမ်ႇယမ်ဝႃႈ သင်ႁဝ်းၶႃႈ ဢဝ်ၶေႃႈငၢႆႈငၢႆႈဢွၼ်ၸိူဝ်းၼႆႉသေ ႁဵတ်းသၢင်ႈၵႂႃႇၼႆၸိုင် တေၵေႈလိတ်ႈလႆႈ လွင်ႈၼၵ်းၸႂ် ဢၼ်ၸၢင်ႊပဵၼ်မႃးလႆႈၸွမ်းၼႃႈၵၢၼ်ၼၼ်ႉ ၵူႊၵေႃႉၽႂ်မၼ်းယူႇ။
Comments
Post a Comment