တိူင်းမၼ်းႁေလႃႈ ....

ႁၵ်ႉၵူၼ်းၵေႃႉ႞တေႉတေႉသေတႃႉ ၵူၺ်းဢမ်ႇတၼ်းလႆႈမွၵ်ႇလၢတ်ႈ ၵႂၢမ်းႁၵ်ႉတေႃႇၶဝ် လႄႈ ဢမ်ႇပဵၼ်ႁူမ်ႈ ၸၢတ်ႈပၢၼ်ၸွမ်းၶဝ်ၼၼ်ႉ ယၢမ်ႈမီးမႃးယူႇသႄႈ။

ၼႂ်းၸၢတ်ႈပၢၼ်ၼႆႉ ယၢမ်ႈမီးမႃး ယိူင်းမၢႆ ဢၼ်ၸဝ်ႈၵဝ်ႇ ၶႂ်ႈႁဵတ်းၶႂ်ႈသၢင်ႈၼၼ်ႉယူႇသေတႃႉ ဢမ်ႇပဵၼ်ႁဵတ်းသၢင်ႈမႃးၼၼ်ႉၵေႃႈ မီးယူႇသႄႈ။

ၶႂ်ႈလႆႈယူႇသေတႃႉ ယွၼ်ႉသေလၢႆငိုၼ်းသေ ဢမ်ႇပဵၼ်သိုဝ်ႉမႃးႁေ ႁိုင်ၼၢၼ်းမႃးၵေႃႈ လိုမ်းၶူဝ်းၶွင်ဢၼ်ၼၼ်ႉ ၵႂႃႇပႅတ်ႈႁင်းၵွႆးၵေႃႈ ပဵၼ်ယူႇၵွႆး။

ယၢမ်ႈမီးဢူၺ်းၵေႃႉ ဢၼ်မိုတ်ႈ ဢၼ်ႁၵ်ႉၵၼ်မႃးယူႇသေတႃႉ ဝၢႆးလင်မႃး ဢမ်ႇပဵၼ်ထူပ်းမၼ်းထႅင်ႈ ႁေပွၵ်ႈၵေႃႈ မီးယူႇ။

ယွၼ်ႉလႆႈၸႂ်လႄႈ မိူဝ်ႈပူၼ်ႉမႃး ၵႆႉၵႆႉပဵၼ်ထွမ်ႇယူႇသေတႃႉ ဝၢႆးလင်မႃး ၽဵင်းၵႂၢမ်းႁူဝ်ၼၼ်ႉ ၼႂ်းၾူၼ်းၸဝ်ႈၵဝ်ႇၵွႆးၵေႃႈ ယင်းဢမ်ႇဝႆႉယဝ်ႉဢိူဝ်ႈ။

ၸၢတ်ႈပၢၼ်ၵူၼ်းႁဝ်းတင်းသဵင်ႈၵေႃႈ မိူၼ်ၼႆၵွႆးၼင်ႇၵဝ်ႇ ၼႂ်းၶၢဝ်းယၢမ်း တိုၵ်ႉမီးသၢႆၸႂ် ႁင်းၽႂ်မၼ်းၼႆႉ ဢမ်ႇၸႂ်ႈဝႃႈ တိုၼ်းတေလႆႈ ယူႇၸွမ်း ၵႂႃႇၸွမ်း ပႆၸွမ်းၶဝ်ယူႇတႃႇသေႇ။ ၶႂ်ႈယူႇၸွမ်း ၵႂႃႇၸွမ်း ပႆၸွမ်းၶဝ်ယူႇတႃႇသေႇၵေႃႈ ဢမ်ႇလႆႈၼင်ႇၵဝ်ႇ။

လူဝ်ႇလႆႈလိုမ်းပႅတ်ႈ ၵူၼ်းၸိူဝ်း ႁဝ်းဢမ်ႇၸၢင်ႊႁူပ်ႉၵၼ်လႆႈထႅင်ႈၼၼ်ႉ......

ၵွင်လင်ပႅတ်ႈ လွင်ႈတၢင်းဢၼ်ႁဝ်း တေဢမ်ႇႁၼ်မၼ်းလႆႈထႅင်ႈယဝ်ႉၼၼ်ႉလႄႈ.........
ပွႆႇဝၢင်းပႅတ်ႈ လွင်ႈတၢင်းဢၼ်တေဢမ်ႇပဵၼ်မႃးလႆႈၼၼ်ႉသေ.......

ယိပ်းမိုဝ်း ႁူမ်ႈၸွမ်း ႁွမ်းပႆၵႂႃႇၸွမ်း လွင်ႈတၢင်း လႄႈ ၵူၼ်း ၸိူဝ်းဢၼ်တေငမ်ႇမႅၼ်ႈၸွမ်း ၸၢတ်ႈပၢၼ် တူဝ်ၵဝ်ႇၼၼ်ႉ တေႃႇသၢႆၸႂ်ပေႃးသုတ်းသဵင်ႈလႄႈ။

ပေႃးတေထၢမ်ဝႃႈ ဢမ်ႇၸႂ်ထိုင်ၶိုၼ်းႁႃႉၼႆတႄႉ မၢင်ပွၵ်ႈ မၢင်လႂ် မိူဝ်ႈဢမ်ႇထၢင်ႇသေ ဝူၼ်ႉမႅၼ်ႈၺႃး လွင်ႈမၼ်းၼၼ်ႉတႄႉၵေႃႈ ၸႂ်ထိုင်ယူႇသႄႈ။

ၵူၺ်းၵႃႈ ပေႃးတေထၢမ်ဝႃႈ မိူဝ်ႈလဵဝ်ၸွင်ႇတေဢဝ်ႁိုဝ်ၼႆတႄႉၵေႃႈ တေယုမ်ႉသေပၼ်ၶေႃႈတွပ်ႇၵႂႃႇဝႃႈ.........
တိူင်းမၼ်းႁေလႃႈ..... ၼႆၵွႆးယဝ်ႉ..........။